الثلاثاء، 10 مايو، 2011

أنا وداليا..والسيد الرئيس


رشا فرحات

كثيرا ما تدور بيني وبين ابنتي داليا حوارات كثيرة متعددة تنتهي بجملة " حلي عني" أو ربما" قومي نامي"  حينما تزداد وتيرة أسئلة داليا وتضعني بين شباك قاتلة فلا أجد لها رداً، وعلى فكرة، أسئلة الأطفال دائما جريئة في الصميم، تضعنا على مفترق طرق من البلاهة بيننا وبين أنفسنا فنتذكر أننا بتنا غرباء عن الواقع، وأحيانا تكون مؤلمة خصوصاً حينما تشاركني داليا في مشاهدة تقرير إخباري مؤلم أو متابعة قراءة احد الأخبار أو القصص الإنسانية، عبر الانترنت .. فتنهال علي الأسئلة والمداخلات البريئة، واليكم بعضاً من الأخبار التي شاركتني داليا متابعتها ثم حاصرتني بأسئلتها الطفولية الجريئة، المحرجة جداااااااااً

الخبر الأول:
 توفيت الطفلة عبير ابنة الأسير يوسف سكافي،  دون أن تتمكن من تحقيق أمنيتها المتمثلة باحتضان والدها وتقبيل يديه، كبقية أطفال العالم دون حرمان من حق الطفولة بالحياة في كنف الوالدين.
وكانت الطفلة عبير (11 عاما) دخلت في غيبوبة، منذ أيام، إثر مرض أصابها جراء الصدمة العصبية والخوف والقلق الذي انتابها في ظل غياب والدها، الذي يقبع في سجن النقب الصحراوي ويقضي حكماً بالسجن المؤبد أربع مرات، أمضى منه ثمانية أعوام.
التعقيبات:
-        داليا: هي يا ماما عبير من وقتيش ما شافت أبوها؟
-        أنا: هي يا ماما شافت أبوها مرة وحدة بس كان من وراء زجاج عازل عشان هيك كانت بتتمنى تحضه
-        داليا: طيب وليش صار فيها هيك؟
-        أنا: عشان يا ماما انحرمت من شوفة أبوها فصار معها صدمة عصبية
-        داليا:ليش هو ممنوع يحضن الأسير أولاده؟
-        أنا:آه.. لأن الاحتلال الإسرائيلي عامل زجاج عازل بين السجين وعائلته ممنوع يمسكوا ايدو وممنوع يحضنوه
-        داليا: هو الرئيس بيعرف بهدا الكلام؟
-        أنا : أكيد بيعرف يا ماما
-        داليا: وليش ساكت يا ماما؟
-        أنا ...نظرة بلاهة، صرخة " حلي عني يا داليا"

الخبر الثاني:
يتسبب الحصار الظالم المفروض على مدن وقرى ومخيمات قطاع غزة بمعاناة كافة شرائح المواطنين وعلى كافة الأصعدة والقطاعات .
 القطاع الصحي كان أكثر الميادين تعرضاً للضرر حيث تسبب الحصار الخانق بنقص حاد في الأدوية والمعدات الطبية الأمر الذي تسبب في استشهاد حوالي 30 مريضاً، أغلبهم من الأطفال،  بسبب عدم وجود الأدوية والعلاج اللازم داخل القطاع وبسبب منعهم من قبل سلطات الاحتلال الصهيوني من السفر للعلاج بالخارج .

التعقيبات:
-        داليا: هما يا ماما المرضى إلي في مستشفى الشفا، ناقصهم دوا؟
-        أنا: آه يا ماما
-        داليا: يا حرام يا ماما ، طيب ليش يا ماما ما نروح نشتري دوا ونعطيهم اياه؟
-        أنا: الدوا مقطوع يا ماما بسبب الحصار، يعني كمان من الصيدليات ما بنقدر نشتريه
-        داليا: ليش هما مسكرين الباب إلي بيدخل منه الدوا؟
-        أنا: لا يا ماما الاحتلال الإسرائيلي مانع دخول الدوا على قطاع غزة، وعشان هيك بيموتوا الأطفال من نقص الدوا
-        داليا بخوف: يعني يا ماما لو مرضت، أو يوسف مرض، أو أنت أو بابا مرضتوا ما بنلاقي دوا؟
-        أنا: إن شالله ما حدا فينا بيمرض وبيحتاج لأي دوا
-        داليا: يعني هو الواحد بيموت يا ماما إذا مرض وما شرب الدوا؟
-    أنا: مش في كل الأحوال يا ماما، إذا كان المرض خطير ومحتاج الدوا كتير، وإذا كان المريض تعبان، كبير في السن كتير، أو صغير كتير ما بيتحمل المرض، بس إن شالله ما بنمرض وما نحتاج لدوا، ما تخافي
-        داليا بفزع: يعني ياسمين عشانها صغيرة إذا مرضت بتموت؟
-        أنا: لا يا ماما إن شالله ما بصير في حدا فينا أي مرض ولا حدا بيموت
-        داليا: الرئيس بيعرف يا ماما أنو ما في دوا في مستشفى الشفا، أكيد لا؟
-        أنا: آه يا ماما ما بيعرف أكيد، لو بيعرف كان عمل أشي
-        داليا: طيب يا ماما خلينا نروح نحكي معه تليفون ونقله
-        أنا: داليااااااااااااا، حلي عني، بكفي حكي


الخبر الثالث:
في عام ألفين وثمانية قامت سلطات الاحتلال بتدمير الطرق المؤدية لبيت الحاج صبري غريب الذي يسكن في قرية بيت إجزا القريبة من القدس لإقامة جدار الفصل العنصري . فمنزل الحاج يقع في قلب مستوطنة " عفن هداشا " .  قام المحتلون بعزل منزله بأسلاك شائكة يصل ارتفاعها إلى ستة أمتار. ووضعوا بوابة الكترونية على المدخل المؤدي لمنزله .  عرض المحتلون على الحاج غريب مليوني دولار كي يترك منزله، ولكنه لن يترك منزله حتى لو دفعوا له كل أموال العالم .   "منقول من مدونة" قِطعُ حَلوَى ونُثارُ غيْمٍ"

التعقيبات:
-        داليا: هو يا ماما الحاج أبو سمير كيف بيدخل على بيته؟
-        أنا : في بوابة يا ماما، عاملينها قوات الاحتلال عشان يدخل منها أبو سمير.
-        داليا: طيب البوابة هادي عليها حارس؟
-        أنا: طبعا يا ماما
-        داليا: ولما يجو ضيوف يزوروا أبو سمير، بيسمحولهم يدخلو؟
-        أنا: بيخبر أبو سمير حارس البوابة وبيدفعلو 60 شيكل عشان يفتح البوابة للضيوف بعد ما يفتشوهم
-        داليا: ستين شيكل، طيب إذا بدو يروح أبو سمير يشتري ساندويش فلافل، أو شيبس، أو شوكلاته، كمان بدفع ستين شيكل؟
-        أنا: آه بيدفع
-        داليا باستغراب: كل مرة بدو يطلع راح يدفع ستين شيكل؟
-        أنا: آه راح يدفع
-        داليا: طيب شو هالعيشة، ما يبيع البيت أحسن ما دام أعطوه مليونين
-        أنا: لا يا داليا، لازم الواحد ما يبيع بيته لليهود
-        داليا بمكر: يعني أنت لو مكانه يا ماما ما بتبيعي البيت؟
-        أنا: لا طبعا يا ماما ما ببيع
-        داليا: طيب راح يخلصو مصارينا واحنا ندفع لحارس البوابة كل ما بدنا نطلع مشوار
-        أنا: مش مهم، المهم ما نبيع أرضنا
-        داليا: يا حرام قصة الحاج أبو سمير بتحزن يا ماما
-        آه والله
-        طيب يا ماما الرئيس أكيد ما بيعرف؟
-        أكيد
-    طيب هالمرة قومي نكلمو لازم يعرف، ويعطي أبو سمير فلوس يدفع للحارس، أو يمكن يروح يحارب ويكسر كل المستوطنات إلي جبن بيت أبو سمير، صح ؟!!
-        داليااااااااااا، قووووومي نااااااااااامي

الخبر الرابع:
هدمت قوات الاحتلال الإسرائيلي 14 منزلاً في بيت حانون ومدينة الخليل في الوقت الذي شنت حملة اعتقالات واسعة في نابلس التي اجتاحت بعض قراها فجر الاثنين.
وقالت وكالة الأنباء الفلسطينية "وفا" أن قوات الاحتلال الإسرائيلية، جرفت ظهر يوم الاثنين 12منزلاً في منطقة عزبة بيت حانون شمال قطاع غزة.   وأفادت مديرية الأمن العام في محافظات غزة، أن جرافات عسكرية إسرائيلية مدعومة بعدد من الدبابات والآليات العسكرية، قامت بتجريف 12منزلأ في منطقة عزبة بيت حانون، وألحقت عملية التجريف دماراً هائلاً في ممتلكات المواطنين.

التعقيبات:
-        داليا: ماما يعني شو تجريف؟
-        أنا: يعني الدبابات الإسرائيلية بتدخل كل البيوت إلي بنيت بدون ترخيص وتبدأ بهدمها
-        داليا: هي إسرائيل لما دخلت أخدت قرية سيد سيدو، أخدت منا ترخيص؟
-        أنا: وبعدين مع أسئلتك يا داليا، طبعا لا، هي احتلت ما دخلت بترخيص
-        داليا: طيب ليش إحنا ما بنحاربها؟ عشان نرجع قرية سيدو؟
-        أنا: لأنو إحنا وقعنا معهم اتفاقية سلام: اسمها، أوسلو، وعشان هيك لازم نحترم اتفاقية السلام
-        داليا: طيب هو إحنا وقعنا في الاتفاقية على انو نسكت لما تتجرف أراضينا؟
-        أكيد لا، بس هي إسرائيل عاد إلي ما بتحترم الاتفاق الموقع، وبصراحة، أنا ما بعرف على ايش وقعوا بالضبط يوم اتفاقية أوسلو
-        ومن وقتيش الاتفاقية هادي" أوسلو"؟
-        أنا: يعني صارلها سبعتاشر سنة
-        داليا: والرئيس معقول يكون شايف الأرض التي تجرفت، طب إذا شايف ليش ساكت؟
-        أنا: داليا، الرئيس شايف وعارف كل أشي وساكت لأنو في اتفاقية سلام لازم يحترمها ما بيقدر يخترق الاتفاقية
-        يعني شو يخترق؟
-        يعني يعمل أشي ينهي الاتفاقية غير الأشياء الموقعة، هادي اتفاقية سلام ولازم يحترمها، وقع لازم يحترم التوقيع.
-    داليا: سلام سلام، والرئيس شايف، والدوا مش داخل، والمرضى بموتو، وعبير ماتت، وأبوها محبوس، وما بقدر يحضنها، والحاج أبو سمير ما بيقدر يطلع من بيته، والدبابات بتهدم بالبيوت، والرئيس عارف وشايف وبيحترم السلام، يا سلام سلم يا ماما .
                                    ...
والي بيعرف داليا عن جد، وبصدق أيضاً، سيعلم أنها فعلاً من أصحاب نظرية" يا سلام سلم ...



ليست هناك تعليقات: